Teks Passio Jumat Agung ( bahasa Karo)

TURI-TURIN KINISERAN TUHANTA JESUS KRISTUS

Joh 18:1-19:42

P: Penuri-nuri, J: Jesus, Ks:Kalak si enterem, Kd: Kalak si d&ban, Sd' Soradiberu, Pit: Pilatus, Ptr: Petrus.

P.           Enda me turiturin kiniseran Tuhanta Jesus Kristus, si nisuratken si Johanes:

Ibas berngi e, Jesus lawes ngepari baluren Lau Kidron. Kenca seh ilepar, Jesus bengket ku bas sada peken ras ajar-ajar-Na Judas si penghianat e, meteh ingan e, sabab enggo megati i je pulung Jesus ras ajar-ajar-Na.E maka reh me Judas ku je. Ibabana sada pasuken prajurit ras piga-piga penjaga rumah pertoton kalak Jahudi si isuruh imam-imam si mbelin janah ras kalak  Parisi. Kalak enda nda i ersenjata janah ibabana pe'lampu ras obor. Enggo ieteh   Jesus kai si nandangi jadi man Bana: e maka ideherina si reh e, jenari nina:

 J.        I seda ramen ndu?

P.        Erjabab kalak nda i.

Ks.         Jesus kalak Nasaret e.

P.        Nina Jesus:

J.             Aku kap kata ndu e.

P.           Judas si penghianat e tedis i je ras kalak nda i. Asum nina Jesus: Aku kap kata ndu e, surut kalak e kerina jenari guling ku taneh. Isungkun Jesus ka kalak ndai, janah ni-na:

J.         Ise kin daramen ndu?

P.            Erjabab kalak e

Ks.      Jesus kalak Nasaret e.

P.           Nina Jesus:

J.             Ma enggo kukataken man bandu maka Aku me si idarami ndu e? Dage adi aku kin daramen ndu, pelepaslah kalak enda lawes.

P.           Si enda ikataken Jesus gelah seh kai si enggo ikataken-Na, e me: O Bapa labo sada pe kupelepas bene kalak si enggo iendesken-Ndu man bangku. Simon Petrus lit pedangna. Idek-dekna pedangna e jenari itampulna juak-juak Imam si mbelin, seh retap cupingna si kemuhen. Gelar juak-juak ndai e me si Malkus. Jenari nina Jesus man Petrus:

J.         Sembungken pedang ndu e! Aku labo banci la minem tare calung kiniseran si ibereken man bangku

P.           Jenari itangkap perajurit-perajurit ras perwira bage pe penjaga-penjaga rumah pertoton e Jesus. Kenca iiketna ibabana ngadap man Annas. Si Annas, e me mama Kayapas. Kayapas e me Imam si mbelin ibas tahun si ndai, Kayapas si enggo ngataken man kalak Jahu di, maka ulin sekalak saja mate guna bangsa kerina. Simon Petrus ras sekalak ajar-ajar si deban ngikut-ngikut Jesus. Teman Simon Petrus enda ndai itandai Imam si mbelin,e maka banci terus ikutkenna Jesus ku kesain rumah Imam si mbelin e.Tapi Petrus nimai i daraten pintu gerbang. Jenari ndarat ka teman Petrus e Ercakap-cakap ia ras diberu si erjaga ibas pintu gerbang, jenari ibabana Petrus ku bas. Tapi nina diberu e man Petrus:

Sd.         Ma kam kin sekalak ibas ajar-ajar-Na e?

P.        Nina Petrus njababsa

Plt      Labo

P.        Ibas berngi si ndai seh kal bergehna. Juak-juak ras si erjaga, mpegara api i kesain e, jenari cudu ia i kelewet api e. Ideheri Petrus kalak e, jenari ikut ia cudu. Isungkuni Imam si mbelin me Jesus kerna ajar-ajar-Na kai si iajarken-Na.Nina Jesus ngaloi:

J.         Terang-terangen kap aku rusur ngerana. Aku ngajar ibas rumah-rumah persembahen bage pe ibas rumah pertoton ingan pulung kalak Jahudi. La pernah Aku ngerana erbuni-buni. Engkai maka Aku isungkuni ndu? Sungkunilah kalak si enggo megi pengajarenku. Sungkunilah ia, tentu ietehna nge kai si enggo Kuturiken man bana.

P.        Megi pengerana Jesus e, sekalak si erjaga e minter marap ia janah nina:

Kd.        Pangna kam ngerana bage man Imam si mbelin!

P.           Ngaloi Jesus man bana:

J.             Adi lit salah ibas pengeranangku e, katakenlah man kalak si i jenda salahku e. Tapi adi labo salah pengeranangku e, engkai maka iparap ndu Aku?

P.            Jenan isuruh Annas perajurit-perajurit maba Jesus ngadap man Kayapas, Imam si mbelin e. Paksa si e Jesus igariken denga. Petrus tedis denga deher api e dingenna cu du. E maka nina kalak si ije man bana:

Ks.      Makam kin sekalak ibas ajar-ajar-Na e?

P.        Tapi merso Petrus, nina:

Ptr.        Labo.

P.            Jenari  nina sekalak juak-juak Imam si mbelin, e me kade-kade si enggo retap cupingna ibahan Petrus:

Kd.         Ma kam kin si kuidah ras la asum ibas peken e?

P.        Merso ka Petrus, nina:

Pt.       Labo.

P.        Kenca bage nina, mintes tekuak manuk.

Rende..............

P.           Kenca terang, erpagi-pagi si lam-pas ibaba kalak ndai Jesus ibas rumah Kayapas nari ku istana Gubenur. Kalak Jahudi la bengket kubas istana e sabab la atena ia meluat rikutken Undang-undang agama gelah banci ia ikut ibas man pangan Paskah. E maka ndarat Pilatus njumpai kalak e, jenari nungkun ia, nina:

Plt.      Kai kin salahNa maka iaduken ndu?

P.           Erjabap kalak e:

Ks.        Labo la ibaba kami ngadap man bandu adi la kin lit salahNa.

P.        Nina Pilatus man kalak e:

Plt.      Babalah Ia, janah kamlah ngadili Ia  rikutken undang-undang agama ndu

P.        Ngaloi kalak Jahudi e:

Ks.      Kami la banci munuh kalak.

P.        Bage me jadi gelah seh kai si enggo ikataken Jesus kerna kematen-Na. Mulihken Pilatus kubas istana jenari idilona Jesus. Nungkun ia man Jesus nina:

Plt.      Kam kin raj a kalak Jahudi e?

P.            Erjabab Jesus:

J.             Ibas ukurndu nari kin penungkune-ndu enda Entali kalak si deban enggo erberita man bandu kerna Aku?

P,        Ngaloi Pilatus.

Plt.      Kalak Jahudi kin aku? BangsaNdu ras imam-imam si mbelin e nge ngendesken kam man bangku. Kai kin enggo ibahan-Ndu?

P.        Nina Jesus:

J.             KinirajanKu labo ibas doni enda nari asalna. Adi ibas doni enda ari kin kinirajan kutentu enggo ngelawan ajar-ajar Kugelah ula Aku endesken man kalak Jahudi. Tapi kinirajan -Ku labo ibas doni enda nari!

P.           Jenari nungkun Pilatus:

Plt.        Adi bage, raja dage kam?

P.           Erjabab Jesus:

J.         Bagi katandu e me. Aku tubuh dingen reh ku doni enda sada ngenca tujun-Ku, e me guna encidahken kebenaren Dibata. Janah kalak si ngaloken kebenaren Dibata e ibegikenna nge Aku.

P.        Jenari nungkun ka Pilatus, nina:

Plt.        Kai kin kebenaren e?

P.        Jenari ndarat ka Pilatus njumpai kalak Jahudi e. Nina:

Plt.        Lait kudat salah-Na guna ngukum Ia. Tapi rikutken kebiasan i tengah-tengah ndu, ibas tiap-tiap wari raya paska kupulahi sekalak tahanen man bandu. Atendu kin maka kupulahi raja kalak Jahudi e man bandu?

P.        Erjabab kalak Jahudi e alu sora megang:

Ks.         Lang! Ula ia pulahi. Pulahilah si Barabas!

P.                    Barabas e me sekalak pengerampok. Kencabage isuruh Pilatus perajurit-perajurina ngeligasi Jesus. Ibahan perajurit-perajuritna tengkuluk duri jenari itamakenna ku takal Jesus. Kenca bage ipakekenna man Jesus jubah si megara tua. Ideherina Jesus jenari nina:

Kd.        Sintabi, o Raja kalak Jahudi!

P.            Kenca bage iparapna Jesus.

Ndarat ka Pilatus sekali nari jenari nina man kalak si enterem e:

Plt.                         Nehenlah, kubaba me la ndarat ku lebe-lebe ndu gelah idah ndu maka la lit kudat salah-Na guna ngukum Ia.

P.            E maka ndarat me Jesus si enggo make tengkuluk duri ras jubah si megara tua e. Nina Pilatus man kalak si enterem e

Plt.      Nehenlah! Enda me Ia!

Rende..................

P.         Ngidah Jesus enggo ndarat, nina imam-imam si mbelin ras pengawal-pengawal alu sora megang:

Ks.      Pakukenlah la ku kayu persilang!

P.        Nina Pilatus man kalak e:

Plt.      Babalah la, janah kamlah makuken la ku kayu persilang. Aku, la lit kudat salahna guna ngukum Ia.

P.        Ngaloi kalak Jahudi e:

Ks.         Rikutken undang-undang agama kami la arus iukum mate, sabab   iakuken-Na maka la Anak Dibata.

P.        Megi kata e reh biarna Pilatus. Mulihken  Pilatus kubas istana, jenari nungkun ia man Jesus nina:

Plt.      I ja nari kin Kam?

P.        Tapi la ngaloi Jesus. E  maka nina Pilatus man Bana:

Plt.      La kam nggit ngaloi aku? Ingetlah! Lit kap kuasangku mulahi Kam janah lit pe kuasangku  makuken Kam ku kayu persilang!

P.        Ngaloi Jesus:

J.          Labo lit kuasandu nandangi Aku, adi la kin ibereken Dibata  man bandu. E  maka beliden nge dosa kalak si ngendesken Aku man bandu, asangken dosa ndu!

P.            Megi kata Jesus e, idarami Pilatus dalan guna mulahi Jesus. Tapi ngerana kalak Jahudi e alu sora si megang, ni na:

Ks.         Adi ipulahindu Ia,

e tandana kam la erteman ras pemerintah Roma! Kalak si ngakuken dirina Raja, musuh pemerintah kap.

P.        Megi kata enda ibaba Pilatus me Jesus ndarat, Jenari kundul la ibas kursi pengadilen ibas ingan si igelari kesain batu . (Ibas cakap Heber igelari Gabbatta)

Tupung e nandangi ciger me wari. Karaben ibas wari si e ibenaken me wari raya paska. Nina Pilatus man kalak Jahudi e:

Plt.         Enda me Raja ndu!

P.           Ngaloi kalak si enterem alu sora si megang:

Ks.      Bunuhlah la! Bunuhlah la! Pakukenlah la ku kayu persilang!

P.        Nungkun Pilatus:

Plt.     Atendu kin gelah kupakuken Rajandu enda ku kayu persilang?

P.            Erjabab imam-imam si mbelin:

Ks.        Raja Roma ngenca raja kami.

P.        Kenca bage iendesken Pilatus me Jesus man kalak e guna ipakuken ku kayu persi lang. E maka ibaba kalak ndai me Jesus. Ndarat Jesus ipersanna kayu persilang inganNa ipakuken. Erdalan la ku ingan si igelari "Golgota" Ibas cakap Heber. I je me Jesus ipakuken kalak ndai ku kayu persilang. Ipakukenna pe dua kalak penjahat, sekalak arah kawes Jesus, sekalak nari ka arah kemuhen-Na. Isuratken Pilatus sada keterangen kerna salah Jesus, e me: Jesus kalak Nasaret, Raja kalak Jahudi, jenari ileketkenna i kayu persilang arah babo takal ingan Je-sus. Enterem kalak Jahudi ngogesa, sabab ingan Jesus ipakuken e la ndauh i kuta nari. Keterangen ndai isuratken ibas cakap Heber, latin bage pe ibas cakap Junani. Nina Imam si mbelin kalak Jahudi man Pilatus:

Ks.       Ula suratken: Raja kalak Jahudi, tapi suratkenlah: "Nina kalak.enda: Aku kap Raja kalak Jahudi".

P.        Tapi ngaloi Pilatus:

Plt.        Kai si enggo kusuratken e, la nari banci isambari!

P.           Kenca Jesus ipakuken perajurit-perajurit e, ibuatna ius Jesus jenari ibagi-bagi empat kenna, tersada bagin ia sekalak. Ibuatna pe jubah Jesus, jubah e i datas nari seh ku teruh la lit perjarumenna. Nina perajurit-perajurit e sapih-sapih ia:

Ks.       Jubah enda ula sicaingken. Siundiken sajalah guna nentuken man ise jubah enda.

P.            Si enda jadi gelah seh si tersurat ibas Pustaka Sibadia. "Ibagi-bagikenna iusku, janah iundikenna jubahku". Enda me si ibahan perajurit-perajurit e. Deherken kayu persilang Jesus, tedis nande-Na senina nandeNa, Maria ndehara Kleopas ras Maria Magdalena. Idah Jesus nandeNa tedis i je ras ajar-ajar si ikelengi-Na, e maka nina man nande-Na:

J.          O  Nande, enda me anak ndu!

P.        Jenari nina Jesus man ajar-ajar si kelengi-Na e:

J.          Enda me nande ndu.

P.        E maka mulai paksa si ndai ibaba ajar-ajar e nande Jesus ringan ibas rumahna. Kenca bage ieteh Jesus maka enggo dung kerina dahin-Na. Janah gelah seh bagi si tersurat bas Pustaka sibadia, nina Jesus: Muas Aku.

P.            Ibas ingan ndai lit sada guci dem anggur si macem, Icelupken kalak ndai bunga karang ku bas anggur e, jenari icucukkenna ku batang isop, kenca bage idudurkenna ku biber Jesus. Icep-cep Jesus anggur e, jenari nina:

 J.         Enggo dung!

(Sinik kita kentisik dingen siukuri ibas pusuhta sekalak-sekalak kerna kematen Tuhanta Jesus Kristus)

P.       Asum Jesus ipakuken e, e me wari jumat, wari persikapen guna wari Sabat kalak Jahudi. Kalak Jahudi ersura-sura gelah mayat kalak si ipakuken e ula nai min gantung i kayu persilang, sabab wari sabat si pepagina, e me wari sabat si mbelin.   E maka ipindoken kalak Jahudi man kalak siipakuken e dingen ipesusurna mayatna e i kayu persilang nari. E  maka ipenggelken perajurit-perajurit nahe kalak si pemena ras sipeduaken si ipakuken raduken Jesus e. Tapi kenca ia seh, Jesus enggo mate. E maka sekalak perajurit nebak awak Jesus alu lembingna; ndarat dareh ras lau ibas nari: Kalak si ngidah kejadin enda sendiri ngemeritaken keja dian enda, gelah kam pe tek Kai si iberitakenna e tu-hu kap, janah ietehna maka kai si ikatakenna e tuhu-tuhu nge jadi. Si enda jadi gelah seh si tersurat ibas Pustaka sibadia, e me "Sada pe labo ipenggelken tulan-Na." Lit pe tersurat ibas Pustaka Sibadia: "Ipernehen kalak si nebak e me kalak si enggo itebak na". Kenca bage ipindoken Jusup kalak Arimatea man Pilatus gelah banci min ibuatna mayat Jesus. Si jusup, e me kalak si enggo tek man Jesus, tapi la terang-terangen sabab mbiar ia kalak Jahudi si erkuasa.Pemindon Jusup enda ibere Pilatus, e maka lawes Jusup ngelegi mayat Jesus. Nikodemus si gelgel e pernah reh ndahi Jesus berngi-berngi, ikut pe ngelegi mayat Jesus e. Ibabana kira-kira telu puluh kilo minak mur si isinggur ras minak gaharu. Duana kalak enda muat mayat Jesus, jenari ibalutina alu kain putih janah itamakenna pe rempah-rempah rikutken adat penguburen kalak Jahudi.Deherken ingan Jesus ipakuken e, lit sada taman. Ibas taman e lit sada kuburen si mbaru,si langa pernah itamaken ku bas kalak mate. Erdan-danken wari si ndai e me wari persikapen guna wari sabat kalak Jahudi,  janah kuburen e pe ndeher ka e maka  i je me ikuburken kalak ndai Jesus.

Bagenda me Berita si Meriah si nipeseh man banta.